Mlemavu avamiwa akatwa mkono Morogoro

Katika kijiji cha Nyalutanga kata ya Kisaki mkoani Morogoro, Nasoro Msingili ambae ni mlemavu wa Ngozi amevamiwa na watu wasiojulikana na kumkata mkono wa kushoto na kutokomea nao ambapo tayari watu wawili wanashikiliwa na Polisi mkoani humo.

Kwa mujibu wa Kaimu Kamanda wa Polisi Mkoa wa Morogoro, ACP. Leonce Rwegasira amesema tukio hilo la kikatili limetokea Oktoba 3 majira ya saa sita Usiku, katika Kijiji cha Nyalutanga, kilichopo Kata ya Kisaki Wilayani Morogoro, na kwa sasa Bwana Nasoro Msingili amelazwa katika kituo cha Afya Duthumi akiendelea kupatiwa matibabu huku tayari watu wawili wakishirikiwa kwa mahojiano zaidi kuhusiana na tukio hilo.

Akizungumzia tukio hilo katibu wa chama cha watu wenye ulemavu wa ngozi wilaya ya Morogoro Tatu Hussein ameitaka serikali kushirikiana na wadau mbalimbali katika kuweka mikakati ya kudumu ya kukabilianana matukio hayo

Kufuatia tukio hilo jeshi la Polisi mkoa wa Morogoro limewataka wananchi kuendeleza ushirikiano ili kuwabaini wote waliohusika katika tukio hilo.