Mkuu wa wilaya atoa siku saba

Mkuu wa Wilaya ya Kinondoni Ally Saum Hapi amemjia juu mwekezaji Liu Deng Wei na kumpa siku saba kuhakikisha analipa stahiki zote za wafanyakazi.

 Hayo yametokea leo baada ya Mkuu huyo wa Wilaya kufanya ziara katika Mgahawa wa Tangren uliopo Mikocheni jijini Dar es Salaam ambapo amekutana na mwekezaji anayemiliki mgahawa huo pamoja na wafanyakazi ambao wameeleza kuwa na malimbikizo ya malipo yao.

Wafanyakazi wameeleza kutolipwa malimbikizo yao kwa muda wa miaka kumi ikiwemo kufanya kazi bila likizo pamoja na kutopewa malipo ya kufanya kazi kwa muda wa ziada ‘Over Time’.

Baada ya kusikiliza malalamiko hayo DC Hapi ameagiza stahiki zao zishughulikiwe ndani ya siku saba. Pia Hapi ameagiza wafanyakazi waunganishwe kwenye mifuko ya hifadhi ya jamii haraka iwezekanavyo na wapewe mafunzo ya namna inavyofanya kazi.

 

"Tunapenda sana wawekezaji lakini sio wawekezaji wasiofuata misingi, taratibu na sheria za nchi, namuomba mwekezaji alipe malimbikizo yote ya wafanyakazi na awaunganishe na mifuko ya hifadhi za jamii vinginevyo tutachukua hatua zaidi", Amesema DC Hapi.

Pia DC Hapi katika ziara yake ametembelea kiwanda cha kutengeneza lifti cha SEC East African kilichopo Masaki na kuutaka uongozi wa kampuni hiyo kuweka mahusiano mazuri na wafanyakazi wao ili kutatua changamoto zinazowakabili.