Idadi ya waliokufa kwa gongo yaongezeka

Idadi ya watu waliofariki kwa kunywa pombe aina ya gongo jijini Dar es salaam katika eneo la Kimara, imeongezeka na kufikia 10 mpaka sasa. 

  

Akithibitisha kutokea kwa tukio hilo, Kamanda wa polisi kanda maalum Dar es salaam, Lazaro Mambosasa, amesema tukio hilo limetokea Oktoba 3, 2017 eneo la Kimara Stop Over kwa mama Anoza, ambaye ndiye alikuwa akiuza pombe hiyo.

Kamanda Mambosasa ameendelea kwa kusema kwamba walipata taarifa kutoka kwa watu tofauti ambao ni miongoni mwa ndugu wa marehemu, kuwa ndugu yao alikunywa pombe kwa mama Anoza na kuanza kupata maumivu ya tumbo, kisha baadaye kufariki dunia.

”Tulipokea taarifa kutoka kwa mwananchi aitwaye Matigo Ramadhani mkazi wa Stop Over, kwamba ndugu yake alikwenda kunywa pombe kwa mama Anoza, aliporudi akawa analalamika maumivu ya tumbo, akampeleka hospitali ya Mwananyamala na kutibiwa kisha akarudishwa nyumbani, baada ya muda mfupi akafariki dunia”, amesema Kamanda Mambosasa.

Kamanda Mambosasa ameendelea kusema kwamba ...”Baada ya muda alitokea mtu mwengine kuja kuripoti kuwa aliporudi nyumbani hakumkuta mlinzi wake ajulikanaye kwa jina la Yona, na baada ya kumtafuta walimkuta akiwa amefariki nje ya uzio”, amesema Kamanda Mambosasa.

Kamanda Mambosasa amesema miili mingine ya watu 8 imehifadhiwa katika hospitali ya Tumbi Kibaha, huku polisi wakiendelea kumtafuta mwanamke huyo (Mama Anoza) ambaye hajulikani aliko mpaka sasa, na badhi ya pombe imeshachukuliwa kupelekwa kwa Mkemia Mkuu wa serikali ili kubaini nini hasa chanzo cha vifo hivyo.